Gossip Lanka News - Gossip Lanka News | Ex Gossip | Latest news from Sri Lanka

Tuesday, January 9, 2018

පන්දු යවන්නෝ දකුණු අප්‍රිකාව දිනවති


සංචාරක ඉන්දීය කණ්ඩායමට එරෙහිව කේප් ටවුන්හි නිව්ලෑන්ඞ්ස් ක්‍රීඩාංගණයේදී පැවැති පළමු ටෙස්ට් තරගය නිමා වීමට තවත් දිනයක් ඉතිරිව තිබියදීම ඉන් ලකුණු 72 ක ජයක් වාර්තා කිරීමට සත්කාරක දකුණු අප්‍රිකානු කණ්ඩායම ඊයේ (8 වැනිදා) සමත් විය.

ජයග්‍රහණය සඳහා ලකුණු 208 ක ඉලක්කයක් හඹාගිය ඉන්දීය කණ්ඩායමේ දෙවැනි ඉනිම ලකුණු 135 කට සීමා කිරීමට වර්නන් පිලැන්ඩර් ප්‍රමුඛ දකුණු අප්‍රිකානු පන්දු යවන්නෝ සමත් වූහ. දක්ෂ පන්දු යැවීමක නිරත වූ පිලැන්ඩර් ලකුණු 42 කට කඩුලු 6 ක් දවාගනිමින් ඉන්දීය කණ්ඩායමේ ජයග්‍රාහී මාවත අවහිර කළේය.

තරගයේ වීරයා ලෙසින්ද සම්මාන දිනාගත් පිලැන්ඩර්, පළමු ඉනිමේදී ලකුණු 33 කට දවාගත් කඩුලු 3 ත් සමගින් මෙම තරගයේදී ලකුණු 75 කට දවාගත් මුලු කඩුලු සංඛ්‍යාව 9 කි. ඉන්දීය දෙවැනි ඉනිම අඩු ලකුණු සංඛ්‍යාවකට සීමා කිරීම සඳහා පිලැන්ඩර්ට අනගි සහායක් දුන් මෝනි මෝකල් සහ කගිසෝ රබාඩා කඩුලු 2 බැගින් දවාගත්හ.

ඉන්දීය දෙවැනි ඉනිමේ වැඩිම ලකුණු ලාභියා බවට පත් වූ රවිචන්ද්‍රන් අෂ්වින් හතරේ පහර 5 ක් සමගින් ලකුණු 37 ක් රැස්කළ අතර නායක විරාට් කෝලි ලකුණු 28 ක් රැස්කළේ හතරේ පහර 4 ක් සමගිනි.

තෙවැනි දිනය වූ ඊයේ (7 වැනිදා) තරගය නතර කරන විට කඩුලු 2 ක් දැවී ලකුණු 65 ක් ලබා සිටි දකුණු අප්‍රිකානු කණ්ඩායමට සිය දෙවැනි ඉනිම සඳහා අද දිනයේදී අලුතින් එක්කරගත හැකි වූයේ ලකුණු තවත් ලකුණු 65 ක් පමණි. එහිදී ඒ.බී. ඩිවිලියස් හයේ පහර 2 ක් සහ හතරේ පහර 2 ක් සමගින් ලකුණු 35 ක් රැස්කළේය.

ජස්ප්‍රීට් බුම්රා සහ මොහොමඞ් සාමි කඩුලු 3 බැගින් දවාගනිමින් දකුණු අප්‍රිකානු පිතිකරුවන් අසරණ කළ අතර බුවනේෂ්වර් කුමාර් සහ හර්දීක් පාණ්ඩ්‍යා කඩුලු 2 බැගින් දවාගනිමින් පන්දුවෙන් දස්කම් දැක්වූහ.

දකුණු අප්‍රිකාව පළමු ඉනිම - සියලු දෙනා දැවී 286
(ඒ.බී. ඩිවිලියර්ස් 65, ෆෆ් ඩුප්ලෙසීස් 62, ක්වින්ටන් ඩි’කොක් 43, වර්නන් ෆිලැන්ඩර් 23, කේෂව් මහරාජ් 35, කගීසෝ රබාඩා 26, බුවනේෂ්වර් කුමාර් 87/4, රවිචන්ද්‍රන් අශ්වින් 21/2)

ඉන්දියාව පළමු ඉනිම - සියලු දෙනා දැවී 209
(චෙටේෂ්වර් පුජාරා 26, හර්දික් පාණ්ඩ්‍යා 93, බුවනේෂ්වර් කුමාර් 25, වර්නන් ෆිලැන්ඩර් 33/3, කගිසෝ රබාඩා 34/3, ඬේල් ස්ටේන් 51/2, මෝනි මෝකල් 57/2)

දකුණු අප්‍රිකාව දෙවැනි ඉනිම - සියලු දෙනා දැවී 130
(ඒඞ්න් මාක්‍රම් 34, ඩීන් එල්ගා 25, ඒ.බී. ඩිවිලියස් 35, මොහොමඞ් සාමි 28/3, ජස්ප්‍රීට් බුම්රා 39/3, හර්දික් පාණ්ඩ්‍යා 27/2, බුවනේෂ්වර් කුමාර් 33/2)

ඉන්දියාව දෙවැනි ඉනිම - සියලු දෙනා දැවී 135
(ශිකර් ධවාන් 16, විරාට් කෝලි 28, රවිචන්ද්‍රන් අෂ්වින් 37, වර්නන් ෆිලැන්ඩර් 42/6, කගිසෝ රබාඩා 41/2, මෝනි මෝකල් 42/2)

No comments:

Post a Comment